पिंपरी चिंचवड : प्रतिनिधी
पिंपरी चिंचवड महानगरपालिका कर्मचारी महासंघाच्या वतीने दरवर्षीप्रमाणे यंदाही गणेशोत्सव मोठ्या उत्साहात, भक्तीभावाने व सांस्कृतिक कार्यक्रमांच्या माध्यमातून महापालिकेच्या मुख्य प्रशासकीय इमारतीत साजरा करण्यास सुरुवात झाली आहे.
आज (२८ ऑगस्ट) रोजी सायंकाळी महापालिका आयुक्त तथा प्रशासक शेखर सिंह यांच्या हस्ते श्री गणरायाची विधिवत आरती करण्यात आली. यावेळी “गणपती बाप्पा मोरया” च्या गजराने संपूर्ण परिसर दुमदुमून गेला होता.
यावेळी अतिरिक्त आयुक्त प्रदीप जांभळे पाटील, विजयकुमार खोराटे, सहशहर अभियंता बापू गायकवाड, उपायुक्त अण्णा बोदडे, जनता संपर्क अधिकारी प्रफुल्ल पुराणिक, कर्मचारी महासंघाचे उपाध्यक्ष मनोज माछरे, खजिनदार नितीन सनगीर आदी मान्यवर उपस्थित होते. तसेच महासंघाचे पदाधिकारी व महापालिकेतील अधिकारी-कर्मचारी मोठ्या संख्येने उपस्थित राहिले होते.
गणेशोत्सवाच्या निमित्ताने यावर्षी कर्मचारी महासंघाच्या वतीने विविध धार्मिक, सांस्कृतिक आणि सामाजिक उपक्रमांचे आयोजन करण्यात आले आहे. यामध्ये २९ ऑगस्ट २०२५ रोजी श्री गणपती अथर्वशीर्ष पठण हा विशेष धार्मिक कार्यक्रम पार पडणार असून, सांस्कृतिक कार्यक्रमांचीही मेजवानी भाविकांना अनुभवता येणार आहे.
याशिवाय, गणेशोत्सव विसर्जनावेळी पर्यावरणपूरक उपक्रम राबवले जाणार असल्याची माहिती महासंघाच्या पदाधिकाऱ्यांनी दिली. पर्यावरण संवर्धनाचा संदेश देण्यासाठी यंदाचा उत्सव अधिक उपयुक्त ठरेल, असेही त्यांनी सांगितले.
महापालिकेतील गणेशोत्सव हा कर्मचारी व नागरिकांसाठी एकात्मतेचा, भक्तीचा आणि सामाजिक बांधिलकीचा उत्सव ठरत असून, पुढील काही दिवसांमध्ये विविध उपक्रमांमुळे महापालिकेचे वातावरण मंगलमय राहणार आहे.
About The Author
