तळेगाव दाभाडे : प्रतिनिधी
सेवाधाम ट्रस्ट ग्रंथालय व मोफत वाचनालयाच्या वतीने कै. कल्याणराव उर्फ रामचंद्र जाधव यांच्या स्मरणार्थ जगद्गुरु संतश्रेष्ठ श्री तुकाराम महाराज लोकसंवाद व्याख्यानमाला-२०२५ चे आयोजन करण्यात आले आहे. व्याख्यानमालेचे हे २३ वे वर्ष असून त्या निमित्ताने शुक्रवार दिनांक ७ फेब्रुवारी रोजी सायंकाळी ८.०० वाजता ग्रंथालय प्रांगण, नाना भालेराव कॉलनी, तळेगाव दाभाडे (स्टेशन) येथे समाज प्रबोधनकार ह. भ. प. निवृत्ती महाराज देशमुख (इंदुरीकर) यांचे सुश्राव्य कीर्तनाचे आयोजन करण्यात आले आहे.
याच कार्यक्रमा दरम्यान मावळचे आमदार सुनील (आण्णा) शेळके यांचा मावळ विधानसभा मतदारसंघात सलग दुसऱ्यांदा विक्रमी मताधिक्याने निवड झाल्याबद्दल भव्य नागरी सत्कार करण्यात येणार आहे.
या कार्यक्रमाचे प्रायोजक दुबई निवासी विनोद रामचंद्र जाधव (चेअरमन- सावा हेल्थकेअर लि.) हे असून कार्यक्रमाच्या अध्यक्षस्थानी गणेशआप्पा ढोरे (मा. सभापती, पंचायत समिती मावळ) असणार आहेत.
समाज प्रबोधनाचा वसा घेतलेल्या सेवाधाम ग्रंथालय व मोफत वाचनालयाच्या वतीने नेहमीच समाज उपयोगी विविध कार्यक्रमांचे व उपक्रमांचे आयोजन केले जाते त्याला नागरिकांचा व श्रोत्यांचा उत्स्फूर्त प्रतिसाद नेहमीच मिळतो. श्रोत्यांनी याही व्याख्यानमालेस उपस्थित राहून कार्यक्रमाची शोभा वाढवावी असे आवाहन ग्रंथालयाचे अध्यक्ष सुरेश धोत्रे व सचिव डॉ. वर्षा वाढोकर यांनी केले आहे.
About The Author
