तळेगाव दाभाडे : प्रतिनिधी
पुणे जिल्ह्यातील तळेगाव दाभाडे शहराच्या लगत असलेल्या प्रसिद्ध पर्यटनस्थळ कुंडमळा येथे इंद्रायणी नदीवरील लोखंडी पूल रविवार, १५ जून २०२५ रोजी दुपारी कोसळून एक भीषण दुर्घटना घडली.
रविवार असल्याने परिसरात मोठ्या प्रमाणावर पर्यटकांची गर्दी होती. याच गर्दीत काही पर्यटक पुलावर थांबले असताना अचानक पूल कोसळला आणि अनेक जण थेट नदीत पडले. घटनेची माहिती मिळताच स्थानिक पोलीस, ग्रामस्थ आणि आपदा मित्र यांनी घटनास्थळी धाव घेतली असून, बचावकार्य सुरू करण्यात आले आहे.
या घटनेत अनेक पर्यटक नदीच्या प्रवाहात वाहून गेल्याची भीती व्यक्त होत असून, आतापर्यंत काही जणांचा मृत्यू झाल्याची माहिती समोर आली आहे. मृतांचा आकडा विविध वृत्तानुसार वेगवेगळा सांगितला जात आहे, तर अनेक जण जखमी झाले आहेत. ही दुर्दैवी घटना आज दुपारी सुमारे ३ ते ३:३० च्या सुमारास घडली.
प्राथमिक माहितीनुसार, हा पूल सुमारे ३० वर्षे जुना आणि जीर्ण अवस्थेत होता. पुलाच्या क्षमतेपेक्षा जास्त पर्यटक एकाच वेळी त्यावर जमल्याने पुलाला भार सहन न होऊन तो कोसळला. दोन महिन्यांपूर्वीच हा पूल धोकादायक म्हणून वापरासाठी बंद करण्यात आला होता, तरीही पर्यटक त्याचा वापर करत होते.
या घटनेची माहिती मिळताच स्थानिक प्रशासन, पोलीस आणि राष्ट्रीय आपत्ती प्रतिसाद दलाचे (NDRF) पथक घटनास्थळी दाखल झाले असून मोठ्या प्रमाणावर बचावकार्य सुरू आहे. जखमींना तातडीने जवळच्या रुग्णालयांमध्ये दाखल करण्यात आले आहे. नदीचा प्रवाह आणि पावसामुळे बचावकार्यात अडथळे येत आहेत.
स्थानिक आमदार आणि प्रशासकीय अधिकाऱ्यांनी घटनास्थळी भेट देऊन परिस्थितीचा आढावा घेतला आहे. या दुर्घटनेच्या चौकशीचे आदेश देण्यात आले असून, दोषींवर कारवाई केली जाईल, असे आश्वासन देण्यात आले आहे.
या घटनेमुळे संपूर्ण परिसरात शोककळा पसरली असून, बचावकार्य अद्यापही सुरू आहे. मृतांचा आणि जखमींचा निश्चित आकडा प्रशासनाकडून लवकरच जाहीर केला जाईल, अशी अपेक्षा
आहे.
About The Author
