आमदार शंकर जगताप यांच्या पाठपुराव्याला यश; वाहतूक कोंडीच्या समस्येला दिलासा
पिंपरी चिंचवड : प्रतिनिधी
अखेर नागरिकांच्या दीर्घ प्रतीक्षेला पूर्णविराम मिळाला आहे. आमदार शंकर जगताप यांच्या सातत्यपूर्ण पाठपुराव्यानंतर वाकड ते मामुर्डी दरम्यानच्या सेवा रस्त्यांच्या कामाला प्रत्यक्ष सुरूवात झाली आहे. या कामामुळे परिसरातील वाहतूक कोंडीचा त्रास कमी होण्याची अपेक्षा व्यक्त होत आहे.
या भागातील पाहणी दौऱ्यात आमदार जगताप यांनी संबंधित अधिकाऱ्यांना काम तातडीने सुरू करण्याचे स्पष्ट निर्देश दिले होते. त्यांच्या सूचनांनंतरच आज प्रत्यक्ष कामाला गती मिळाली आहे.
काम सुरू होताच ठिकठिकाणी डांबरीकरण, अतिक्रमण हटविणे, सर्विस लाईन शिफ्ट करणे आणि वाहतूक मार्ग मोकळा करणे अशी कामे हाती घेण्यात आली आहेत. राष्ट्रीय महामार्ग प्राधिकरण (NHAI), पिंपरी चिंचवड महानगरपालिका (PCMC), वाहतूक विभाग आणि महावितरण या सर्व यंत्रणांमध्ये आवश्यक समन्वय साधला जात आहे.
आमदार जगताप म्हणाले, “वाकड–मामुर्डी परिसरातील नागरिकांना गेल्या वर्षभरापासून वाहतूक कोंडीचा मोठा त्रास सहन करावा लागत आहे. त्यावर कायमस्वरूपी तोडगा म्हणून सेवा रस्त्यांची कामे सुरू केली असून ती ठरलेल्या वेळेत पूर्ण करण्याचा आमचा प्रयत्न आहे.”
दरम्यान, भुजबळ चौक ते भूमकर चौकापर्यंतचे काम मोठ्या प्रमाणात पूर्ण झाले आहे. आता उर्वरित सेवा रस्त्यांचे काम जलद गतीने पूर्ण करण्याचे लक्ष्य ठेवण्यात आले आहे.
वाहतुकीला अडथळा ठरणारे होर्डिंग्ज, झाडे, कंटेनर आणि अतिक्रमणे हटविण्याचे कामही युद्धपातळीवर सुरू आहे. काम पूर्ण झाल्यानंतर या परिसरातील वाहनचालकांना सुरळीत आणि सुलभ प्रवासाचा अनुभव मिळेल, असा विश्वास आमदार जगताप यांनी व्यक्त केला.
About The Author
