महापौर रवि लांडगे यांच्या हस्ते प्रतिमेस पुष्पहार अर्पण; महापालिका अधिकारी, पदाधिकारी व कर्मचाऱ्यांची उपस्थिती
पिंपरी-चिंचवड : प्रतिनिधी
थोर समाजसुधारक, विचारवंत, लेखक आणि निर्भीड पत्रकार केशव सीताराम उर्फ प्रबोधनकार ठाकरे यांच्या जयंतीनिमित्त पिंपरी-चिंचवड महानगरपालिकेच्या प्रशासकीय इमारतीत अभिवादन कार्यक्रमाचे आयोजन करण्यात आले. महापौर रवि लांडगे यांच्या हस्ते प्रबोधनकार ठाकरे यांच्या प्रतिमेस पुष्पहार अर्पण करून त्यांना विनम्र अभिवादन करण्यात आले.
यावेळी महानगरपालिकेच्या पदाधिकारी, अधिकारी आणि विविध विभागांतील कर्मचारी मोठ्या संख्येने उपस्थित होते. कार्यक्रमाच्या निमित्ताने प्रबोधनकार ठाकरे यांच्या सामाजिक आणि वैचारिक कार्याचे स्मरण करण्यात आले. समाजातील अनिष्ट प्रथा, अंधश्रद्धा आणि विषमतेविरोधात त्यांनी केलेल्या संघर्षातून आजच्या पिढीने प्रेरणा घेण्याची गरज व्यक्त करण्यात आली.
प्रबोधनकार ठाकरे यांनी आपल्या लेखणीच्या माध्यमातून समाजातील रूढी-परंपरा, अंधश्रद्धा, जातीय विषमता आणि सामाजिक अन्यायावर कठोर प्रहार केला. त्यांनी केवळ लेखन केले नाही, तर समाजातील दुर्बल आणि वंचित घटकांच्या प्रश्नांना वाचा फोडण्याचे काम केले. त्यांच्या परखड आणि निर्भीड विचारांनी महाराष्ट्रातील समाजप्रबोधनाच्या चळवळीला महत्त्वपूर्ण दिशा मिळाली.
विवेक, समता, स्वाभिमान आणि सामाजिक परिवर्तन ही प्रबोधनकार ठाकरे यांच्या विचारांची प्रमुख वैशिष्ट्ये होती. सामाजिक सुधारणांसाठी त्यांनी आपल्या लेखणीला प्रभावी माध्यम बनविले. अन्यायाविरुद्ध आवाज उठविताना त्यांनी कोणतीही तडजोड केली नाही. त्यामुळे त्यांचे साहित्य आणि विचार आजही सामाजिक परिवर्तनाच्या वाटचालीत मार्गदर्शक ठरत असल्याचे यावेळी नमूद करण्यात आले.
आजच्या बदलत्या सामाजिक परिस्थितीत प्रबोधनकार ठाकरे यांच्या विचारांची उपयुक्तता अधिक अधोरेखित होते. समाजात वैज्ञानिक दृष्टिकोन, विवेकनिष्ठ विचारसरणी, सामाजिक समता आणि बंधुभाव रुजविण्यासाठी त्यांच्या कार्याचा अभ्यास होणे आवश्यक आहे. त्यांच्या जयंतीनिमित्त केवळ प्रतिमेला अभिवादन न करता त्यांच्या विचारांचा समाजजीवनात अंगीकार करणे, हीच त्यांना खरी आदरांजली ठरेल, असा संदेश या कार्यक्रमातून देण्यात आला.
यावेळी उपमहापौर शर्मिला बाबर, विरोधी पक्षनेते भाऊसाहेब भोईर, विधी समिती सभापती सुजाता बोराटे, शिक्षण समिती सभापती रविना अंघोळकर, महिला व बालकल्याण समिती सभापती राणीमाई पठारे, उपआयुक्त अण्णा बोदडे, लेखाधिकारी दीपक गायकवाड, जनता संपर्क अधिकारी प्रफुल्ल पुराणिक, सामाजिक कार्यकर्ते मधुकर बच्चे यांच्यासह महानगरपालिकेच्या विविध विभागांतील अधिकारी व कर्मचारी उपस्थित होते.
कार्यक्रमाच्या माध्यमातून प्रबोधनकार ठाकरे यांच्या सामाजिक कार्याचे स्मरण करून त्यांच्या पुरोगामी आणि परिवर्तनवादी विचारांना अभिवादन करण्यात आले.
About The Author
