तळेगाव दाभाडे : प्रतिनिधी
नानासाहेब पेशवे यांच्या व्दिशताब्दी जन्मसोहळ्या निमित्त नानासाहेब पेशवे स्मारक समिती आणि श्री शिवाजी रायगड स्मारक मंडळ यांच्या वतीने आयोजित भव्य सोहळा रविवार दिनांक ८ डिसेंबर रोजी सायं ४ वाजता महालक्ष्मी देवस्थान ट्रस्ट परिसर वेणगाव (कर्जत) येथे संपन्न होणार आहे.
या कार्यक्रमासाठी प्रमुख वक्ते म्हणून चाणक्य मंडळाचे अध्यक्ष अविनाश धर्माधिकारी तसेच, खासदार श्रीरंग बारणे, आमदार महेंद्र थोरवे व प्रशांत ठाकूर, पेशव्यांचे वारसदार पुष्कर पेशवे, इतिहास अभ्यासक मोहन शेटे उपस्थित राहणार आहेत. समारंभ स्थळी मर्दानी खेळांची प्रात्यक्षिके, शस्त्र व क्रांतिकारक छायाचित्रे प्रदर्शन आयोजित केले आहे. नानासाहेब पेशवे यांचा जन्म ८ डिसेंबर १८२४ रोजी रायगड जिल्ह्यातील कर्जत जवळच्या वेणगाव येथे झाला. सन १८५७ मध्ये इंग्रजांविरुद्ध झालेल्या स्वातंत्र्य संग्रामात नानासाहेब पेशवे यांचा सिंहाचा वाटा होता. त्यांची दूरदृष्टी, संघटन कौशल्य, धाडस, अविश्रांत परिश्रम करण्याची तयारी व प्रखर राष्ट्रभक्ती या गुणांमुळे हा संग्राम सर्वव्यापी होऊ शकला.
या निमित्ताने इतिहास प्रेमी मंडळाने देखील पुणे ते वेणगाव (कर्जत) अशी नानासाहेब पेशवे रथयात्रा आयोजित केली असून, त्यामधे किल्ले रायगड व शनिवारवाडा येथील पवित्र जलकलश नेण्यात येणार आहेत. श्री शिवाजी रायगड स्मारक मंडळ संचलित लोहगड विसापूर विकास मंचाच्या वतीने मावळ तालुक्यात स्वागताचे नियोजन करण्यात आले आहे. दुपारी २ वाजता तळेगाव दाभाडे येथील लिंब फाटा या ठिकाणी आणि त्यानंतर कार्ला फाटा येथे पुष्पवर्षाव करून पूजन करण्यात येईल. स्वागत कार्यक्रमाचे नियोजन मंचाचे संस्थापक सचिन टेकवडे अध्यक्ष विश्वास दौंडकर, मार्गदर्शक संदीप गाडे, सागर कुंभार, सचिन निंबाळकर, अनिकेत आंबेकर, चेतन जोशी, अजय मयेकर, गणेश उंडे, अमोल गोरे, बसप्पा भंडारी आदी कार्यकर्त्यांनी केले आहे. तरी नानासाहेब पेशव्यांना मानवंदना देण्यासाठी मावळ तालुक्यातील सर्व शिवभक्तांनी मोठ्या संख्येने उपस्थित राहण्याचे आवाहन मंचाचे संस्थापक सचिन टेकवडे यांनी केले आहे.
About The Author
