पिंपरी चिंचवड : प्रतिनिधी
गणेशोत्सवाच्या पार्श्वभूमीवर शहरातील विविध विसर्जन घाटांवर तसेच कृत्रिम तलावांवर पिंपरी चिंचवड महापालिकेतर्फे विशेष निर्माल्य संकलन कुंड्या ठेवण्यात आल्या आहेत. पूजेसाठी वापरलेली फुले, पत्री, हार, नारळाचा शेंडा व इतर पूजासाहित्य थेट पाण्यात न टाकता या कुंड्यांमध्ये टाकावे, असे आवाहन महापालिकेने नागरिकांना केले आहे.
दरवर्षी गणेश विसर्जनावेळी मोठ्या प्रमाणावर निर्माल्य थेट नदी वा तलावात टाकले जाते. त्यामुळे जलप्रदूषण वाढते व जलस्रोतांचे पर्यावरणीय संतुलन बिघडते. माशांचे व इतर जलचरांचे अस्तित्व धोक्यात येते. ही समस्या लक्षात घेऊन यंदा महापालिकेने स्वच्छता पथके, स्वयंसेवक आणि निर्माल्य संकलनाची व्यवस्था प्रत्येक विसर्जन स्थळी केली आहे. नागरिकांना जागरूक करण्यासाठी घोषवाक्ये, बॅनर्स तसेच स्वयंसेवकांकडून मार्गदर्शनही केले जाणार आहे.
संकलित झालेले निर्माल्य पुढे सेंद्रिय खत व कंपोस्ट निर्मितीसाठी वापरण्यात येणार आहे. त्यामुळे जलप्रदूषण टळणार असून कचऱ्याचा पर्यावरणपूरक पुनर्वापर साध्य होणार आहे. स्वच्छ भारत अभियान व हरित शहर उपक्रमाशी हा उपक्रम जोडण्यात आला असून नागरिकांच्या सहकार्याशिवाय तो यशस्वी होणार नाही, यावर प्रशासनाने भर दिला आहे.
महापालिकेच्या स्वच्छता विभागाने सर्व विसर्जन स्थळांवर विशेष नियंत्रण पथके नेमली आहेत. या पथकांकडून स्वच्छता, निर्माल्य संकलन व वाहतूक व्यवस्थेवर लक्ष ठेवले जाणार आहे. नागरिकांनी या उपक्रमाला सकारात्मक प्रतिसाद देऊन प्रशासनास सहकार्य करावे, असे आवाहन करण्यात आले आहे.
“गणेशोत्सव हा भक्ती, श्रद्धा आणि आनंदाचा सण आहे. मात्र पर्यावरण संवर्धनाची जबाबदारी आपली सर्वांचीच आहे. विसर्जनावेळी निर्माल्य कुंड्यांमध्येच टाकून जलप्रदूषण रोखण्यासाठी आणि शहराची स्वच्छता राखण्यासाठी प्रत्येकाने पुढाकार घ्यावा,” असे आवाहन पिंपरी चिंचवड महापालिकेने केले आहे.
“नदी व जलस्रोत प्रदूषित होऊ नयेत यासाठी नागरिकांचे सहकार्य अत्यंत महत्त्वाचे आहे. निर्माल्य थेट पाण्यात टाकल्यास ते कुजून प्रदूषण वाढवते. परंतु संकलन कुंड्यांमधून गोळा केलेले साहित्य योग्य प्रकारे खत किंवा इतर पर्यावरणपूरक उपयोगासाठी वापरता येते. त्यामुळे पर्यावरणपूरक गणेशोत्सव साजरा होऊ शकतो.”
– सचिन पवार, उपायुक्त आरोग्य विभाग
About The Author
