पिंपरी चिंचवड शहर पत्रकार संघातर्फे नवनिर्वाचित महापौर, उपमहापौर व सत्तारूढ पक्षनेत्यांचा गौरव
पिंपरी चिंचवड : प्रतिनिधी
पिंपरी चिंचवड महानगरपालिकेच्या राजकीय व प्रशासकीय वाटचालीला नवे वळण देणाऱ्या नवनिर्वाचित महापौर, उपमहापौर आणि सत्तारूढ पक्षनेत्यांची निवड अधिकृतपणे जाहीर होताच शहरातील पत्रकारांनी या नेतृत्वाचे मनापासून स्वागत केले. पिंपरी चिंचवड शहर पत्रकार संघाच्या वतीने महापालिकेच्या तिसऱ्या मजल्यावरील पत्रकार कक्षात आयोजित करण्यात आलेल्या सत्कार समारंभात हा गौरव सोहळा उत्साहात पार पडला.
या प्रसंगी महापौर रवीभाऊ लांडगे, उपमहापौर शर्मिलाताई बाबर आणि सत्तारूढ पक्षनेते प्रशांत शितोळे यांचा सन्मान करण्यात आला. कार्यक्रमाला प्रिंट मीडिया, मुख्य प्रवाहातील माध्यमे तसेच डिजिटल मीडियाचे प्रतिनिधी मोठ्या संख्येने उपस्थित होते. शहराच्या प्रशासनात नवे नेतृत्व येत असताना पत्रकार आणि लोकप्रतिनिधी यांच्यातील संवाद अधिक दृढ व्हावा, या उद्देशाने हा कार्यक्रम आयोजित करण्यात आला होता.
नवनिर्वाचित महापौर रवीभाऊ लांडगे यांचा सत्कार ज्येष्ठ पत्रकार बापूसाहेब गोरे यांच्या हस्ते करण्यात आला. उपमहापौर शर्मिलाताई बाबर यांचा सन्मान पत्रकार संघाच्या अध्यक्षा सायली कुलकर्णी यांनी केला, तर सत्तारूढ पक्षनेते प्रशांत शितोळे यांचा सत्कार पत्रकार सुनील उर्फ बाबू कांबळे यांच्या हस्ते पार पडला. यावेळी माजी उपमहापौर तथा विद्यमान नगरसेवक राजू मिसाळ, माजी नगरसेवक राजू दुर्गे, राजेश पिल्ले तसेच जनता संपर्क विशेष अधिकारी किरण गायकवाड यांची प्रमुख उपस्थिती होती.
सत्काराला उत्तर देताना महापौर रवीभाऊ लांडगे यांनी आपली भूमिका स्पष्ट केली. “एक स्वयंसेवक आज शहराचा महापौर झाला आहे. शहरातील नागरिकांच्या मूलभूत प्रश्नांना प्राधान्य देणे हेच माझे ध्येय आहे. पाणीपुरवठा, आरोग्य सेवा आणि भटक्या कुत्र्यांचा प्रश्न हे शहरासाठी अत्यंत गंभीर विषय असून, यावर तातडीने उपाययोजना करण्याचे आदेश संबंधित अधिकाऱ्यांना देण्यात येतील. महापालिकेतील अधिकारी आणि कर्मचारी यांनी नागरिकांना सहकार्याची भूमिका घ्यावी,” असे त्यांनी ठामपणे सांगितले. तसेच पत्रकार संघाने केलेल्या सत्काराबद्दल त्यांनी सर्व पत्रकारांचे आभार मानले.
या कार्यक्रमाला शहरातील अनेक ज्येष्ठ व युवा पत्रकारांची उपस्थिती लाभली. यामध्ये बाळासाहेब ढसाळ, नंदकुमार सातुर्डेकर, अमोल काकडे, मिलिंद कांबळे, विकास शिंदे, प्रकाश गायकर, संतोष मिश्रा, गणेश यादव, ज्ञानेश्वर भंडारे, गणेश शिंदे, प्रवीण शिर्के, मुकेश जाधव, अशोक लोखंडे, शबनम सय्यद, विनय लोंढे, बद्रीनारायण घुगे, अर्चना मेंगडे, श्रद्धा प्रभुणे यांच्यासह अनेक पत्रकारांचा समावेश होता.
याच कार्यक्रमात पत्रकार संघाच्या अध्यक्षा सायली कुलकर्णी यांचा वाढदिवस महापौरांच्या उपस्थितीत केक कापून साजरा करण्यात आला, ज्यामुळे कार्यक्रमाला आपुलकीचे व आनंदाचे स्वरूप प्राप्त झाले.
कार्यक्रमाचे प्रास्ताविक पत्रकार संघाचे संस्थापक अध्यक्ष बापूसाहेब गोरे यांनी केले, तर आभार प्रदर्शन पत्रकार सुरज साळवे यांनी मानले. पत्रकार आणि लोकप्रतिनिधी यांच्यातील सकारात्मक संवादाचा हा कार्यक्रम शहरासाठी नव्या अपेक्षा निर्माण करणारा ठरला.
About The Author
