आमदार महेश लांडगे यांच्या मागणीला प्रशासनाकडून प्रतिसाद; मुख्यालयाच्या प्रवेशद्वारावरील दर्शनी भागात तैलचित्र
पिंपरी-चिंचवड । प्रतिनिधी
पिंपरी-चिंचवड शहराच्या विकासप्रक्रियेत महत्त्वपूर्ण योगदान देणारे दिवंगत उपमुख्यमंत्री अजित पवार यांच्या स्मृती आता पिंपरी-चिंचवड महापालिकेच्या मुख्यालयात जपल्या जाणार आहेत. महापालिका मुख्य कार्यालयाच्या प्रवेशद्वाराच्या दर्शनी भागात अजित पवार यांचे तैलचित्र लावण्याचे काम पूर्ण झाले आहे. भाजपचे आमदार महेश लांडगे यांनी यासंदर्भात केलेल्या मागणीची दखल घेत महापालिका प्रशासनाने आवश्यक कार्यवाही पूर्ण केली आहे. त्यामुळे मुख्यालयात येणाऱ्या नागरिकांना आणि अभ्यागतांना अजित पवार यांच्या कार्याची आठवण करून देणारे तैलचित्र पाहायला मिळणार आहे.
आमदार महेश लांडगे यांनी ३१ जानेवारी २०२६ रोजी महापालिका प्रशासनाला पत्र पाठवून मुख्यालयात अजित पवार यांचे तैलचित्र लावण्याची मागणी केली होती. महाराष्ट्राच्या राजकारणात आणि विकासाच्या प्रक्रियेत महत्त्वपूर्ण भूमिका बजावलेल्या अजित पवार यांच्या योगदानाची नोंद महापालिका मुख्यालयात असावी, अशी भूमिका त्यांनी मांडली होती. या मागणीच्या अनुषंगाने महापालिका प्रशासनाने प्रशासकीय प्रक्रिया पूर्ण करून तैलचित्र लावण्याची कार्यवाही केली.
महापालिकेच्या स्थापत्य विभागाने दिलेल्या अधिकृत माहितीनुसार, मुख्य कार्यालयाच्या प्रवेशद्वाराजवळील दर्शनी भागात तैलचित्र लावण्यात आले आहे. या कामाची पूर्तता झाल्याचे पत्राद्वारे आमदार लांडगे यांना कळविण्यात आले आहे. स्थापत्य विभागाचे मुख्य अभियंता-१ प्रमोद ओंभासे यांच्या स्वाक्षरीने हे पत्र पाठविण्यात आले आहे. त्यामुळे तैलचित्र लावण्याच्या मागणीवर प्रशासनाकडून कार्यवाही पूर्ण झाल्याचे स्पष्ट झाले आहे.
पुणे जिल्ह्याचे पालकमंत्री तसेच राज्याचे उपमुख्यमंत्री आणि अर्थमंत्री म्हणून काम करताना अजित पवार यांनी विविध विकासकामांचा आढावा घेण्यावर आणि प्रकल्पांच्या अंमलबजावणीला गती देण्यावर भर दिला होता. पिंपरी-चिंचवडमधील रस्ते रुंदीकरण, पायाभूत सुविधांचा विस्तार आणि शहराच्या विकासाशी संबंधित विविध विषयांमध्ये त्यांनी पाठपुरावा केला होता. प्रशासनाकडून कामे वेळेत पूर्ण व्हावीत, यासाठी बैठका आणि प्रत्यक्ष पाहणीच्या माध्यमातून ते आढावा घेत असत.
त्यांच्या या कार्याची आठवण कायम राहावी आणि सार्वजनिक जीवनात योगदान देणाऱ्या नेतृत्वाच्या स्मृती जतन व्हाव्यात, या उद्देशाने तैलचित्राची मागणी करण्यात आली होती. महापालिकेच्या मुख्यालयासारख्या महत्त्वाच्या प्रशासकीय ठिकाणी तैलचित्र लावण्यात आल्याने या उपक्रमाला विशेष महत्त्व प्राप्त झाले आहे.
याबाबत प्रतिक्रिया देताना आमदार महेश लांडगे म्हणाले, “अजितदादांनी पिंपरी-चिंचवडसह पुणे जिल्हा आणि संपूर्ण महाराष्ट्राच्या विकासात मोलाचे योगदान दिले आहे. विकासकामांना गती देण्याची त्यांची हातोटी, प्रशासनावरील पकड आणि कामाच्या दर्जाबाबतचा आग्रह कायम स्मरणात राहील. महाराष्ट्राच्या जडणघडणीत योगदान देणाऱ्या या नेतृत्वाच्या स्मृती महापालिका मुख्यालयात जपल्या जाव्यात, या भावनेतून मी त्यांच्या तैलचित्राची मागणी केली होती. प्रशासनाने त्याची पूर्तता केली, याचे समाधान आहे. त्यांच्या कार्यातून लोकहितासाठी काम करण्याची प्रेरणा मिळत राहील.”
— महेश लांडगे, आमदार, भाजपा, पिंपरी-चिंचवड
About The Author
