बोऱ्हाडेवाडी, डुडुळगाव, वडमुखवाडी, दापोडीतील महापालिका जागांचा प्रस्ताव पुढे; आमदार महेश लांडगे यांच्या पाठपुराव्याला सकारात्मक प्रतिसाद
पिंपरी-चिंचवड । प्रतिनिधी
भोसरी विधानसभा मतदारसंघातील नागरिकांना महसूल विभागाशी संबंधित कामांसाठी दूरवर जावे लागू नये, यासाठी स्थानिक पातळीवर महसुली कार्यालये उपलब्ध करून देण्याच्या हालचालींना आता वेग आला आहे. मंडल अधिकारी आणि ग्राम महसूल अधिकारी अर्थात तलाठी कार्यालयांसाठी पिंपरी-चिंचवड महापालिकेच्या मालकीच्या इमारतींमध्ये जागा उपलब्ध करून देण्याच्या दृष्टीने प्रस्ताव पुढे आला आहे. बोऱ्हाडेवाडी, डुडुळगाव, वडमुखवाडी आणि दापोडी येथील चार जागांचा प्रस्ताव अपर तहसीलदार कार्यालयाने महापालिकेकडे पाठवला आहे.
भोसरी विधानसभा मतदारसंघातील वाढती लोकसंख्या, झपाट्याने होणारा नागरी विस्तार आणि महसूल विभागाशी संबंधित कामांची गरज लक्षात घेता स्थानिक पातळीवर कार्यालये उपलब्ध असणे महत्त्वाचे मानले जात आहे. या पार्श्वभूमीवर भाजपा आमदार महेश लांडगे यांनी महसुली कार्यालयांसाठी कायमस्वरूपी जागा उपलब्ध करून देण्याबाबत सातत्याने पाठपुरावा केला.
पुणे जिल्हाधिकाऱ्यांच्या अध्यक्षतेखाली १५ सप्टेंबर २०२६ रोजी झालेल्या बैठकीतही हा मुद्दा उपस्थित करण्यात आला. मंडल अधिकारी आणि तलाठी कार्यालयांसाठी योग्य जागा उपलब्ध करून देण्याची आवश्यकता आमदार लांडगे यांनी मांडली. त्यानंतर महापालिकेच्या मालकीच्या इमारतींमधील उपलब्ध गाळे आणि खोल्यांचा वापर करण्याबाबत प्रशासकीय पातळीवर कार्यवाही सुरू झाली.
त्यानुसार अपर तहसीलदार कार्यालयाकडून बोऱ्हाडेवाडी, डुडुळगाव, वडमुखवाडी आणि दापोडी येथील उपलब्ध जागांची माहिती घेऊन त्यांचा प्रस्ताव महापालिकेकडे सादर करण्यात आला आहे. संबंधित ग्राम महसूल अधिकाऱ्यांच्या अहवालानुसार या जागा कार्यालयीन वापरासाठी योग्य असल्याचे नमूद करण्यात आले आहे. मात्र, प्रस्तावित जागा महसूल विभागाला प्रत्यक्ष हस्तांतरित होऊन तेथे कार्यालये सुरू होण्यासाठी महापालिका स्तरावरील पुढील प्रशासकीय प्रक्रिया पूर्ण होणे आवश्यक आहे.
सातबारा उतारा, आठ-अ उतारा, फेरफार नोंदी, जमिनीशी संबंधित अभिलेख, विविध महसुली अर्ज आणि त्यांच्या कार्यवाहीचा पाठपुरावा यासाठी नागरिकांना महसूल यंत्रणेशी संपर्क साधावा लागतो. यातील अनेक सेवा ऑनलाइन उपलब्ध झाल्या असल्या, तरी स्थानिक पातळीवरील चौकशी, कागदपत्रांची पूर्तता किंवा नोंदीसंदर्भातील कामांसाठी संबंधित अधिकाऱ्यांशी संपर्काची आवश्यकता भासते.
अशा परिस्थितीत नागरिकांच्या परिसरातच निश्चित कार्यालय उपलब्ध झाल्यास वेळ आणि प्रवासाचा त्रास कमी होण्यास मदत होऊ शकते. तसेच कोणत्या कामासाठी कोणत्या अधिकाऱ्याशी संपर्क साधायचा, याबाबतही नागरिकांना अधिक स्पष्टता मिळण्याची अपेक्षा आहे.
महापालिकेने प्रस्तावित जागांबाबतची पुढील कार्यवाही वेळेत पूर्ण केल्यास या भागातील महसूल यंत्रणेला स्थानिक पातळीवर अधिक सक्षम कार्यालयीन सुविधा मिळू शकतील. मात्र, कार्यालये नेमकी कधी सुरू होतील, याची तारीख अद्याप निश्चित झालेली नाही.
मुख्यमंत्री देवेंद्र फडणवीस आणि महसूल मंत्री चंद्रशेखर बावनकुळे यांच्या मार्गदर्शनाखाली या विषयाचा पाठपुरावा सुरू असल्याचे आमदार महेश लांडगे यांनी सांगितले. महापालिका स्तरावरील प्रक्रिया लवकर पूर्ण करून नागरिकांना त्यांच्या परिसरातच महसूल विभागाच्या सुविधा उपलब्ध करून देण्यासाठी पुढील पाठपुरावा सुरू ठेवणार असल्याचे त्यांनी स्पष्ट केले.
“महसूल विभागाशी संबंधित कामांसाठी नागरिकांना त्यांच्या परिसरातच सुलभ सुविधा मिळाव्यात, हा आमचा प्रयत्न आहे. कार्यालयांच्या जागांबाबतचा प्रस्ताव पुढे गेला आहे. आता महापालिका स्तरावरील कार्यवाही लवकर पूर्ण व्हावी, यासाठी पाठपुरावा सुरू ठेवू.”
— महेश लांडगे, आमदार, भाजप
About The Author
