आमदार महेश लांडगे यांचे आयुक्तांना पत्र; जागा निश्चिती, सविस्तर प्रकल्प अहवाल आणि सर्वसाधारण सभेत ठराव मंजूर करण्यासाठी पाठपुरावा
पिंपरी-चिंचवड | प्रतिनिधी
पिंपरी-चिंचवड शहराच्या सांस्कृतिक विकासाला नवी दिशा देण्यासाठी मोशी–चऱ्होली–चिखली परिसरात दिवंगत ज्येष्ठ अभिनेते नाना पाटेकर यांच्या नावाने भव्य नाट्यगृह आणि बहुउद्देशीय सांस्कृतिक केंद्र उभारण्याचा प्रस्ताव पुढे आला आहे. भाजपचे आमदार महेश लांडगे यांनी यासाठी पुढाकार घेत महापालिका आयुक्त डॉ. विजय सूर्यवंशी यांच्याकडे मागणी केली आहे. प्रस्तावित प्रकल्पासाठी योग्य जागा निश्चित करून सविस्तर प्रकल्प अहवाल तयार करावा, तसेच यासंदर्भातील पुढील कार्यवाही तातडीने सुरू करावी, अशी भूमिका त्यांनी मांडली आहे.
पिंपरी-चिंचवड शहराचा औद्योगिक आणि निवासी विस्तार वेगाने होत आहे. विशेषतः मोशी, चऱ्होली आणि चिखली परिसरात मोठ्या गृहप्रकल्पांमुळे लोकसंख्येत वाढ होत असून, नागरिकांच्या सांस्कृतिक गरजाही विस्तारत आहेत. मात्र, मोठ्या नाट्यप्रयोगांसह विविध सांस्कृतिक कार्यक्रमांचे आयोजन करण्यासाठी आधुनिक सुविधांनी युक्त आणि पुरेशा आसनक्षमतेचे सभागृह उपलब्ध होण्याची गरज आहे. ही बाब लक्षात घेऊन शहराच्या वाढत्या गरजांनुसार सांस्कृतिक पायाभूत सुविधा विकसित करण्याची मागणी करण्यात आली आहे.
पुण्यातील गणेश कला क्रीडा मंचाच्या धर्तीवर भव्य नाट्यगृह उभारण्याची संकल्पना यानिमित्ताने पुन्हा चर्चेत आली आहे. प्रस्तावित केंद्रामुळे नाट्यसंस्था, स्थानिक कलाकार, शाळा, महाविद्यालये आणि सांस्कृतिक संघटनांना कार्यक्रमांसाठी हक्काचे व्यासपीठ उपलब्ध होऊ शकते. नाट्यप्रयोग, संगीत मैफिली, साहित्य संमेलने, व्याख्याने आणि विविध कलाविष्कारांसाठी या केंद्राचा उपयोग होणार असल्याची अपेक्षा व्यक्त करण्यात आली आहे.
मराठी आणि हिंदी चित्रपटसृष्टी, रंगभूमी तसेच सामाजिक क्षेत्रातील योगदानासाठी ओळखल्या जाणाऱ्या ज्येष्ठ अभिनेते नाना पाटेकर यांच्या नावाने हे नाट्यगृह उभारण्याची मागणी करण्यात आली आहे. त्यांच्या कलात्मक प्रवासाचा सन्मान करण्याबरोबरच नवोदित कलाकारांना प्रोत्साहन देणारे व्यासपीठ निर्माण करणे, हा या संकल्पनेमागील उद्देश आहे. त्यामुळे शहराच्या सांस्कृतिक ओळखीला नवी उंची मिळण्यास मदत होईल, अशी अपेक्षा आहे.
प्रस्तावित सांस्कृतिक केंद्रामध्ये प्रशस्त रंगमंच, आधुनिक ध्वनी व प्रकाशयोजना, कलाकारांसाठी स्वतंत्र कक्ष, सरावासाठी जागा आणि लघु कार्यक्रमांसाठी स्वतंत्र सभागृह असावे, अशी मागणी आहे. दिव्यांगसुलभ प्रवेशव्यवस्था, सुरक्षा सुविधा, पुरेसे वाहनतळ आणि सार्वजनिक वाहतुकीची उपलब्धता यांचाही नियोजनात समावेश करण्यावर भर देण्यात आला आहे.
या प्रकल्पाबाबत संबंधित विभागांची संयुक्त बैठक घेऊन जागा निश्चिती आणि सविस्तर प्रकल्प अहवालाची प्रक्रिया सुरू करावी. केलेल्या कार्यवाहीची माहिती लेखी स्वरूपात द्यावी, तसेच या प्रस्तावाला सर्वसाधारण सभेत ठरावाद्वारे मान्यता मिळवून देण्यासाठी कार्यवाही करावी, अशी मागणी आमदार लांडगे यांनी केली आहे.
“पिंपरी-चिंचवडची ओळख केवळ औद्योगिक नगरीपुरती मर्यादित न राहता सांस्कृतिक क्षेत्रातही निर्माण व्हावी. नाना पाटेकर यांच्या नावाने आधुनिक नाट्यगृह उभारल्यास त्यांच्या योगदानाचा सन्मान होईल आणि नवोदित कलाकारांना आपली कला सादर करण्यासाठी हक्काचे व्यासपीठ मिळेल. हा प्रकल्प शहराच्या सांस्कृतिक विकासाला चालना देणारा ठरावा,” अशी भूमिका आमदार महेश लांडगे यांनी व्यक्त केली आहे.
About The Author
