एशियाई क्रीडा स्पर्धेत भारतीय महिला कंपाऊंड तिरंदाजी संघाचा दिमाखदार विजय; चीनवर 238-234 ने मात, जागतिक विक्रमाशी बरोबरी
पुणे : प्रतिनिधी
अचूक निशाणा, जबरदस्त आत्मविश्वास आणि सांघिक कामगिरीच्या जोरावर भारतीय महिला कंपाऊंड तिरंदाजी संघाने एची-नागोया एशियाई क्रीडा स्पर्धेत सुवर्णपदकावर पुन्हा एकदा आपले नाव कोरले. अंतिम सामन्यात भारताने चीनचा 238-234 असा पराभव करत विजेतेपद कायम राखले. या ऐतिहासिक संघात पिंपरी-चिंचवडची युवा धनुर्धारक प्रिथिका प्रदीप, ज्योती सुरेखा वेन्नम आणि चिकिता तनीपार्थी यांचा समावेश होता.
अंतिम सामन्यात भारतीय खेळाडूंनी सुरुवातीपासूनच गुणांची आघाडी कायम ठेवली. चीनच्या खेळाडूंनी आव्हान निर्माण करण्याचा प्रयत्न केला; मात्र भारतीय तिरंदाजांनी दबावाच्या क्षणीही अचूकता आणि संयम कायम ठेवत सामना आपल्या बाजूने झुकवला. अखेर 238-234 अशा चार गुणांच्या फरकाने भारताने सुवर्णपदकावर शिक्कामोर्तब केले.
या विजयाचे आणखी एक वैशिष्ट्य म्हणजे भारताचा 238 गुणांचा स्कोअर हा दक्षिण कोरियाने 2014 मध्ये नोंदवलेल्या जागतिक विक्रमाशी बरोबरी करणारा ठरला. त्यामुळे सुवर्णपदकासोबतच भारतीय संघाच्या कामगिरीची नोंद विक्रमाच्या पातळीवर झाली आहे.
भारतीय महिला संघाने यापूर्वीच्या एशियाई क्रीडा स्पर्धेतही सुवर्णपदक पटकावले होते. त्यामुळे एशियाई क्रीडा स्पर्धेतील महिला कंपाऊंड सांघिक प्रकारातील विजेतेपद भारताने सलग दुसऱ्यांदा राखले आहे. अंतिम फेरीपूर्वी भारताने उपांत्य सामन्यात दक्षिण कोरियाचा 234-233 असा निसटता पराभव केला होता. त्यानंतर अंतिम फेरीत चीनविरुद्धच्या कामगिरीने भारतीय संघाने विजेतेपदावर पुन्हा मोहोर उमटवली.
या संघातील ज्योती सुरेखा वेन्नम यांचे हे एशियाई क्रीडा स्पर्धेतील चौथे सुवर्णपदक ठरले, तर प्रिथिका प्रदीप आणि चिकिता तनीपार्थी यांनी आपल्या पहिल्याच एशियाई क्रीडा स्पर्धेत सुवर्णपदकाचा मान मिळवला.
प्रिथिका प्रदीपच्या या कामगिरीमुळे पिंपरी-चिंचवडच्या क्रीडा क्षेत्राच्या शिरपेचात आणखी एक मानाचा तुरा खोवला गेला आहे. शहरातून घडलेली युवा खेळाडू आंतरराष्ट्रीय स्तरावरील स्पर्धेत भारताचे प्रतिनिधित्व करत सुवर्णपदक जिंकते, ही स्थानिक क्रीडा क्षेत्रासाठी महत्त्वाची बाब ठरली आहे.
प्रिथिकाच्या यशामागे तिचे प्रशिक्षक कुणाल टावरे यांचे मार्गदर्शन, सातत्यपूर्ण सराव आणि तांत्रिक प्रशिक्षण यांचा मोठा वाटा आहे. त्याचबरोबर तिच्या पालकांचा विश्वास, प्रोत्साहन आणि पाठिंबाही तिच्या क्रीडा प्रवासातील महत्त्वाचा आधार राहिला आहे.
पिंपरी-चिंचवड आर्चरी असोसिएशनच्या माध्यमातून शहरात धनुर्विद्येला प्रोत्साहन देण्यासाठी सुरू असलेल्या प्रयत्नांनाही या यशामुळे नवी ऊर्जा मिळाली आहे. युवा खेळाडूंना योग्य प्रशिक्षण, स्पर्धेचा अनुभव आणि आवश्यक व्यासपीठ मिळाल्यास आंतरराष्ट्रीय स्तरावर यश मिळवता येते, हे प्रिथिकाच्या कामगिरीने अधोरेखित केले आहे.
सोनल बुंदेले, सहसचिव महाराष्ट्र धनुर्विद्या संघटना आणि सचिव, पिंपरी-चिंचवड आर्चरी असोसिएशन, यांनी प्रिथिकाच्या कामगिरीबद्दल आनंद व्यक्त केला. शालेय वयातच तिच्यातील गुणवत्ता, जिद्द, मेहनत आणि शिकण्याची तयारी जाणवली होती. त्या गुणांना सातत्यपूर्ण सराव आणि योग्य मार्गदर्शनाची जोड मिळाल्याने आज ती एशियाई क्रीडा स्पर्धेतील सुवर्णपदकापर्यंत पोहोचली आहे, असे त्यांनी सांगितले.
प्रिथिकाचे यश पिंपरी-चिंचवडसह महाराष्ट्र आणि भारतासाठी अभिमानाची बाब असून, तिच्या कामगिरीतून नवोदित धनुर्धारकांना प्रेरणा मिळेल, अशी अपेक्षाही त्यांनी व्यक्त केली. प्रिथिकाचे प्रशिक्षक कुणाल टावरे आणि तिच्या पालकांचे योगदानही त्यांनी अधोरेखित केले.
दरम्यान, भारताच्या या सुवर्णविजयाबद्दल राष्ट्रपती द्रौपदी मुर्मू यांनीही प्रिथिका प्रदीप, चिकिता तनीपार्थी आणि ज्योती सुरेखा वेन्नम यांचे अभिनंदन केले आहे.
प्रिथिकाच्या या सुवर्णवेधामुळे पिंपरी-चिंचवडचे नाव आता एशियाई क्रीडा स्पर्धेच्या सुवर्णपदकाच्या इतिहासातही नोंदले गेले असून, शहरातील युवा खेळाडूंसाठी तिची कामगिरी प्रेरणादायी ठरली आहे.
About The Author
